San Nicolas (TDA) For di nos lectornan nos ta haya reaccion riba diferente topico y den e seccion di ‘Bo Opinion’ un ciudadano critico y consciente ta trece su preocupacion pa dilanti;

‘Esnan cu ta sigui politica di Reino den su totalidad di cerca ta haya cu na Aruba tin cierto desaroyonan hopi peligroso tumando lugar den politica y den prensa cumpra door di e gobierno di Mike Eman.

Pa basta tempo caba publico en general por nota y mira con gobierno hunto cu prensa cumpra ta hibando un campaña di instigacion grandi contra e politico di oposicion Evelin Wever Croes.

Articulonan y declaracionnan na radio y television tras di otro contra e politico Eveline Wever Croes, ta nada otro cu loke na ingles nan ta yama ‘character killing’.

E ta mescos ora cu bo keda ripiti dia aden, dia afor un gañamento, na un dado momento e gañamento  ta haya un bida riba su mes cu ta bay bira un berdad fictisio.

Esey ta loke cu e gobierno di AVP den combinacion cu fraccion di AVP y algun miembro di prensa hopi vies ta haciendo na un forma baho y te hasta peligroso.

Si bay bek den historia anto ta yega na e conclusion cu exactamente e mesun modus operandi a wordo aplica contra e politico hulandes den oposicion na Hulanda, esta Pim Fortuyn y kende a haya asina hopi fama cu muy probablemente den e siguiente eleccion e tempo ey lo por a sali como e partido vencedor cu lo a bay den gobierno.

Hopi medio di comunicacion hulandes cu sosten, sea directo of indirecto, sea consciente of no consciente di politiconan cu tabata contra Pim Fortuyn, a hiba un campaña devastador di instigacion y lastramento formal contra Pim Fortuyn.

E mesun cos ta wordo mira ultimo tempo na Aruba unda cu parlamentarionan di AVP hunto cu gobierno y cu ayudo di e kartel di prensa cumpra, ta lastra y instiga contra Eveline sistematicamente.

Loke ta wordo haci contra Evelin ta un desaroyo sumamente peligroso cu por tin su efectonan manera loke a pasa na Hulanda, unda despues di e atentado contra Fortuyn y su morto, a pone cu mayoria politico hulandes a lamenta despues cu nan mes a participa den e ‘character killing’ di Pim Fortuyn via medionan di comunicacion, pa despues esaki resulta den un asesinato real di e persona.

Awor ta dificil pa e pueblo di Aruba compronde con gobierno hulandes te awe ta midi cu dos midi, unda cu loke na Hulanda no ta acceptable nan ta sigui permiti pa esakinan tuma lugar na Aruba door di prefera di bira cara wak otro banda.

Mas cuestionabel ta cu ora cu un partido cu no ta AVP ta den gobierno, e ora ey Hulanda kier aplica tur regla, ley y statuut a pie de la lettra y esey ta bon bisto cu e relacion cuestionabel di e gobierno hulandes cu e gobierno actual di AVP’

Pa evita persecusion politico, nomber y adres di e persona ta keda na redaccion di Tempo di Aruba (TDA)